CONTRA A S’OCUPATZIONE MILITARE
Casteddu 10 de maju 2025 – annu 164° de sa Dominatzione Italiana
Ancora naes armadas istràngias in su mare sardu, naes de s’esèrtzitu de s’ùrtimu colonizadore de su pòpulu nostru e de sa terra nostra. S’ocupatzione militare de sa terra nostra e s’impreu suo comente a base de esercitatzione pro esèrtzitos de ammaniare pro s’assaltu de àteros pòpulos, pro los privare de sos territòrios natzionales issoro e si los atacare in sos imperos issoro, gasi comente at fatu s’Itàlia pro su territòriu sardu NO Est PRUS DE BALIARE .
Non bastat sa simpre protesta antimilitarista, non bastat adobbare su pùngiu subra de sa mesa. Sa mesa andat bortulada e liberada dae totu sos interessos de s’istadu italianu chi sunt in netu cuntrastu cun sos interessos de sa natzione sarda. S’istadu-guvernu cunsìderat sa Sardigna unu territòriu pròpiu “de s’àtera ala de mare”, de “consumare” pro sos interessos de s’istadu.
EST ORA DE BORTULARE SA MESA TRICOLORE
NON PRO FAGHERE MODERARE SA TIRANNIA
MA PRO FAGHERE ACABBARE SA TIRANNIA
Sa mesa andat bortulada pro liberare sa Sardigna dae totu sos partidos colonos. Sunt issos sos esecutores de òrdines, polìticos e militares, tantu ignavos e serbiles chi non petzi consumant sa salude de su TERRITÒRIU e de sa GENTE de SARDIGNA ma cun sos Kibutz partiticos e sindacales e sas leges eletorales issoro blindant sos òrganos eletivos de su guvernu sardu e los rendent tancados a sas rapresentàntzias sardas.
Sa presèntzia in Sardigna de sas tzerachias militares, de sos partidos e sindacados colonos sunt sas fortilesas de sa dominatzione italiana chi a s’annessione fortzada de sa terra sarda cheret assotziare s’iscantzelladura de su pòpulu sardu matessi, de s’istòria sua, de s’identidade sua de su suo esìstere comente a pòpulu e natzione.
Privare unu pòpulu de sa terra sua, de s’istòria sua, de sa cultura sua, de s’identidade sua
Est GENOTZÌDIU.
Sapadu 10 maju, nois indipendentistas sardos cun sa truma, commando, P. Carrus amus a èssere presentes in su mare nostru, cun unu navieddu nostru, a torrare a nàrrere chi custu est su mare de su pòpulu sardu, de su matessi pòpulu chi lu naigaiat comente a Shardana, pro ordinare a sas naes istràngias de dogare sos ormeggios ostiles e s’istesiare dae sas costas nostras.
Amus a èssere in su mare nostru pro fàghere cumprèndere a sos invasores chi in Sardigna b’at galu sardos chi cumbatent pro sa liberatzione de sa terra issoro e chi ant a sighire a lu fàghere ca est unu dovere issoro, su dovere de cada patriota, su de che catzare sos invasores de sa terra pròpia.
Liberare sa Sardigna de custos pesantes gravàmines Est UNU DOVERE GENERATZIONALE CARA A SAS GENERATZIONES BENIDORAS E UNU DÈPIDU DE PAGARE A SAS GENERATZIONES PASSADAS. EST SU MOMENTU DE SERRARE S’ULTIMA SUDDITANZA ISCOSTIENDE S’ITALIANIDADE DE SA SARDIGNA DAE SU PRESENTE A SU PASSADU.
Sardigna 10-05-2025 annu 16° Dominatzione Italiana COORDINAMENTU NATZIONALE SNI
