𝗔𝗠𝗠𝗘𝗡𝗧𝗨 𝗗𝗘 𝗔𝗡𝗚𝗘𝗟𝗢 𝗖𝗔𝗥𝗜𝗔

𝗦𝗔𝗣𝗔𝗗𝗨 𝟭𝟳 𝗵. 18.30 𝗶𝗻 𝘀𝘂 𝘁𝘇𝗶𝗿𝗰𝘂𝗹𝘂 𝗨𝗧𝗔𝗟𝗔𝗕𝗜’ 𝗶𝗻 𝗡𝘂𝗴𝗼𝗿𝗼

Non manchedas chi est a connoschere una figura de importu mannu pro sa patria sarda e pro sos populos oprimidos che a cussu sardu.

Sapadu 17 maju su tzìrculu culturale Utalabì at a acasagiare una serada pro ammentare una figura importante in s’istòria de s’indipendentismu modernu, chi aiat contribuidu in modu forte a lu fàghere crèschere comente a movimentu anticoluniale e rivolutzionàriu, pro s’emantzipatzione de su pòpulu sardu.

Angelo Caria fiat nàschidu in Nùgoro in su 1947 e aiat dedicadu sa vida sua a sa defensa de sa Sardigna, cumbatende s’opressione coloniale in totus sas formas suas e chirchende de agregare sas fortzas populares sardas a fùrriu a unu progetu de liberatzione.

Sos chertos contra sas bases militares, contra sa cementificatzione de sas costas, contra su coladòrgiu de sas petrolieras in sas bucas de Bonifàtziu, contra sa privatizatzione de sas marinas, pro su bilinguismu e s’ufitzialidade de sa limba sarda l’ant bidu protagonista, paris cun meda àteras, prenende de valore rivolutzionàriu su chertu pro s’indipendèntzia de sa Sardigna, semper in collegamentu e in cunfrontu cun sos àteros pòpulos opressos de s’Europa e de su Mediterràneu.

Lu cherimus ammentare cun una dibata a cale amus cumbidadu a partetzipare sa giornalista Maria Antonietta Piga, su politòlogu Carlo Pala e persones meda chi ant cumpartzidu cun Angelo su chertu polìticu e sa passione tzivile.

Durante sa serada Vittoria Marras at a resare unas cantas poesias de Angelo Caria.

A sighire s’at a tènnere unu cuntzertu de sa Ferrando’s Banda.