TOCAT DE DE LU NARRERE A CRARU
FAGHIMUS UNA PROPOSTA.
Semus totu patzifistas a cantu paret ma in pagos narant a craru ite paghe cherent. Est netzessàriu chi cadaunu neret ite intendet isse pro paghe ca si no cadaunu si faghet mannu mustrende s’istèrgiu e non su chi bi est intro. S’ocasione est pròpiu custa de sa gherra chi sa Rùssia at pesadu in Ucràina. Pro apaghiare cussa gherra non che colat die chi non b’apat manifestadas pro pedire, preparare, pretendere sa paghe, pro faghere agabbare cussa gherra chi est divenende cada die prus perigulosa e in arriscu de si isparghere a àteros logos. Tocat de crarire ite intendimus pro paghe ca si no divenit unu caddu polìticu istrumentale de currere a ocasione e a profetu personale o de partidu o meledos cumplotistas o ideològicos anti unu carchi tipu de sistema o polarizatzione mundiale.
Pro arribare a una proposta de paghe tocat de cuncordare chi su imperialismu est crìmine, chie siat chi lu pràtichet e est crìmine puru a usare a cumbenia pròpia sos diritos de sos pòpulos pro ne assennere àteros. Tra s’imperialismu otzidentale e orientale non b’at unu mentzu e unu peus, sunt ambos crìmines contra a sos pòpulos. Siat s’autodeterminatzione a regulare sa tratentzia tra sos pòpulos e non s’imperialismu de sos istados-natzione.
PROPOSTA DE PAGHE PRO SA GHERRA RUSSA IN UCRAINA.
Sa Russia si ritiret intro sos cunfines suos prima de sa gherra.
S’Ucraina si ritiret intro sos cunfines suos cun su Donbas.
Sas duas republicas de su Donbas siant postas in manos a s’ONU pro chi intro duos annos cramet sos populos de su su Donbas a unu referendum de autodeterminatzione.
Su Donbas siat territòriu nèutru tra Europa e Russia pro 50 annos.
Sa Russia amparet sos dannos fatos pro nessi su 30% e su restu siat a carrigu de totu sos istados chi aderint a s’ONU.
Unu tribunale internatzionale pro indagare e cundennare sos crìmines de gherra.
In custa manera nessunu at bintu e nessunu at pèrdidu tra sos imperialismos ma at bintu s’autodeterminatzione de sos pòpulos. S’imperialismu batit gherra e s’autodeterminatzione batit paghe.