S’umbra mala acabbadora che ha furadu de primitiu una figia dechida de Sardigna, a MICHELA MURGIA, de 51 annos, in su mentzus andare de sa vida. Adiosu Michela, nos lassas, in su coro e in sa mente, ammentos de isperos de riscatu e de dignidade de una Sardigna chi as pensadu e disigiadu Possibile. Letzes de s’istadu fatusi mere in terra nostra ti l’ant impedidu pro sighire a lassare sa Sardigna in manos a sa classe politica angena e a sos collaboradores sardos issoro.
Cussu mundu de rebellia Michè paret chi oe non bi siat prus, est istadu ingullidu propriu dae sa classe politica angena impedidora. In tantos si sunt arresos e cunsignados a su dominadore, cun isperos vanos, pro issos sa Sardigna chi as pensadu tue No est Possibile. Sos che a nois de Sardigna Natzione chi restant in s’andala tua ant a sighire su caminu finas a sa punna, chi che a tie credimus siat Possibile.
A nos bidere in s’ammentu Michè, in su matessi ammentu ue bi est Angelo Caria, Antoni Simon Mossa e tantos ateros chi ant gherradu pro una Sardigna Libera e Soberana. Cundolentzias e passentzias a sa famiglia totu dae parte de Sardigna Natzione Indipendentzia.