PROPOSTA DE COMITADU “NON VOTO” IN SU REFERENDUM COSTITUTZIONALE
A sos Partidos e Movimentos natzionales.
A sos Sindacados natzionales.
A sos Comitados natzionales
A so sotzios, sotziales o culturales o de ateru
A totu sos sardos liberos.
Ogetu: COMITADU PRO SU “NON VOTO “ IN SU REFERENDUM COSTITUTZIONALE DE SANTUGAINE 2016.
Amigos, fìgios lìberos de Sardigna, disorganizados o no, in su mese de santugaine 2016, amus a essere cramados a nos pronuntziare, tramite referendum, supra una riforma costitutzionale proposta dae su guvernu italianu in càrriga. Sa riforma tocat in particulare su tìtulu V e, in peus, sas cumpetèntzias de sas Regiones ordinàrias ma non mutat in nudda sa parte de sa costitutzione chi riguardat sos raportos tra sa Repùblica Italiana e sa Natzione Sardigna a sa cale sighit a essere negada s’esistèntzia e su diritu a s’indipendèntzia, tramite s’art. 5) La Repubblica, unica e indivisibile …. Tale artìculu restat comente fiat prima e duncas, siat sa costitutzione vigente sia cussa modificada mantenent firma sa impositzione de sa suditantzia a sa natzione Sarda.
Pro intrare prus a intro in s’argumentu bos alligo a custu cumbidu unu documentu ammanigiadu dae sa Commissione Referendum de SNI.
Nois indipendentistas de SNI, pensamus e lu ispiegamus bene in su documentu alligadu, chi chie si declarat indipendentista o creet chi sas Sardigna siat una natzione diversa dae cussa italiana e apat diritu a detzidere in manera soberana e indipendente su benidore polìticu e sotziale suo, chene impedimentos impostos dae atos e impedimentos angenos, NON PODAT IN NESSUNA MANERA aprovare unu atu, unu cuntratu, una carta chi de fatu li faghet firmare e atzetare una rinùntzia a sos diritos prima mentovados.
Cunsideradu chi si sunt già formados sos comitados pro su NO e pro su SI e chi nois non podimus aderire ne a s’unu ne a s’àteru ca ambas possibilidades de votu sunt semper unu SI a sa unitzidade e in-divisibilidade de sa Repùblica Italiana, SIA DOVERE NOSTRU DE COSTITUIRE UNU COMITADU PRO S’ASTENSIONE, PRO SU NON VOTO e cumbidare sos sardos a esprimere su disditzu de soberania astenende-si de votare.
Non mi illònghio meda, ca tantu de su chi di-apo narrere est in su documentu mentovadu e arribo
a sa proposta.
• Costituire su Comitadu, intro su 20 de trìulas, imbiende sas adesiones rispondende a custa email de imbiu o a sardignanoestitalia@gmail.com
• Preparare unu documentu base, cumpartidu, curtzu meda in manera chi totu nos bi atzapemus.
• Cunvocare una cunferentzia istampa pro sa die 23 o pro sa die 30 de trìulas, o àtera die de cuncordare.
• Aberrere una pàgina facebook pro cramare gente a nos agiudare in sa campagna referendària.
Su comitadu si costituit cun chie rispondet intro su 20 de trìulas.
Clicca inoche pro iscrier una Email de adesione
Adesiones a sardignanoestitalia@gmail.com
Sardigna 04/06/2016
Bustianu Cumpostu ( Coordinadore natz. De SNI)
Sas motivatziones de SNI: clica inoche pro su documentu