SNI est semprer a sa banda de sos traballadores, in particulare cando pro causa de unu capitalismu ispeculativu coloniale arriscant de perdere su postu de traballu e mandare in miseria sa famiglia issoro e bona parte de su Sulcis.
Sa Portovesme srl est sa punta de s’industializatzione corsara imposta a sa Sardigna, ube si caratzat comente produitiva una atividade de ismaltimentu de sos iscartos de sas atzaglierias italianos e de mesa Europa. Batint in Sardigna sos iscartos de ismaltire che bogant una parte minima de zincu e prumu e su chi restat est un’iscartu nostru de ismaltire a carrigu nostru in su muntonargiu Sardigna.
Custa lavoratzione finta costat de energia prus de su chi si balangiat dae cussu pagu zincu e prumu chi produint e sa Glencor, mere de sa fabrica, no at dinare de perdere e punnat de ismaltire sos iscartos chene los colare in fabrica. Dae perfeta multinatzionale capitalista de sos operaios a sa Glencor non ne li afutit nudda e nudda ne li afutit de su Sulcis, ponet innatis a totu su profetu suo e boh.
Cussos operaios apiligados a 100 metros in sa turre sunt isfrutados e vitimas, isfrutados dae su capitalismu peus chi bi siat e vitimas de su colonialismu italianu chi si at bennidu territoriu e gente de su Sulcis a sos peus profitadores e ispeculadores multinatzionales. SNI, chi gherrat pro sos diritos de sos traballadores, de sa gente e de su populu sardu intreu, non podet no essere solidale cun sos traballadores de su sulcis e non podet non cundennare sa politica coloniale de sa borghesia partitica e sindicale italiana in Sardigna e sas lobby afaristicas chi sunt umiliende e impoverende sa gente sarda e luande su logu faghende de sa Sardigna unu muntonargiu tricolore e no ebbia.