ne damus tocamentu cun tristura manna. Mancat unu gigante de sos diritos de sa natzione sarda. Iscritore, istoricu e prus de totu militante e dirigente de Sardigna Natzione Indipendentzia cun sa cale at fatu tantas batallas e at militadu belleche totu sa vida. Pro contare sas tantas batallas fata pro su diritu de sa natzione sarda a essere soberana in terra sua non diat bastare unu libru intreu, batallas puru eroicas, eroicas ca cun sas pagas risorsas umanas e de economicas amus totu impare cambiadu sa cultura politica de su populu nostru, nois totu umpare ma in particulare tue chi as unidu a sa militantzia sas capatzidades tuas de iscritore e de istoricu. Si devet a tie Zampa Marras si oje Antoni Simon Mossa est cunsideradu su babbu de s’indipendentismu modernu e liberadore. Ses istadu tue a collire sos iscritos de A.S. Mossa in unu libreddu “Le Ragioni dell’Indipendentismo” e ne disvelare su pensiero sardista universale chi isse aiat. Cumbegnos e libros sunt sighidos a cussu libreddu e dae figiu e dischente de A.S. Mossa ne ses divennidu babbu e criadore de unu mitu fundante de s’indipendentismu e de su sardismu in generale.
Mi riservo de las ammentare totu sas batallas ma in custu dolaspiu ne cheglio ammentare calicuna de importu mannu: Su carbone in conca a su sutaministru Calzolari pro sa batalla contra a su carbone in Portu Turres. S’ocupatzione de sa tzentrale de Fiumesanto a capu de su Commando Amsicora contra sas disparidade energetica. S’ocupatzione de sa Penisula Delta in Teulada cun su Commando Frantziscu Tiloca contra a sos poligonos italianos. Su giuramentu in sardu in pratza Montecitoriu contra a sa Bicamerale.
Su referendum contra a sas iscorias ndustriales. Su referendum contra a sa Base Americana de sa Maddalena. S’Intifada contra a sas Iscorias Radioativas. Su referendum contra a sas Tzentrales Nucleares e sas nonucle-dies contra su depositu nucleare, sa presentzia a li Ghiurnate Internazionale de Corti pro nessi 20 annos, Sa defensa de sas sedes de batasuna in Euskadi e tantas ateras chi in custu dolaspiu non b’at logu pro bi capirent. No trascuro de tzertu sas batallas tuas pro sa liba e sa cultura sarda, dae Iscola Sarda a sa radiu in sardu a sas propostas de limba natzionale unica pro sa natzione sarda.
Non trascuro nemancu sas batallas contra a sos epropios e astas chi cheriant furare sa terra a sa gente sarda, sa batalla in Arborea pro sa famiglia Spanu, cussa in Ardara pro sa famiglia Camboni e ateras e ateras. Una vida de batallas giustas sa sua, in divisa de cumbatente sardu, in berrita e billudu e cun in manos sa bandera de sos 4 moros e de Sardigna Natzione, cun nois cumpantzos de annala, cun nois chi semus galu in andala e cun chie che a isse como l’at lassada de primitiu, Angelo Caria, Serafinu Sale, Frantziscu Tiloca, Patritziu Carrus, Giovannino Sanna, Nino Fancello, Giuseppe Loddo, Giuseppe Pintus, Antoni Furcas, Scintilla, Michelli Puggioni, Giampaolo Benone, Giancarlo Saba, Mario Doria, Francesco Dettori e ateros chi como no mi torrant in mente.
Ammentos curiosos puru nos lassas Giunne Prè, in Roma abbassande dae su trenu ti aiant dimandadu “Tenores di Bitti?” e aiant cherfidu sa foto cun tecus e si no cando cun su commandu contra a Aznar in Punta Lada sa pulitzia chi nos fiat impedende nos ast iscapadu ca tue pro finta fias in su telefono cun su ministru Pisanu. Una promissa ti faghimus, sa matessi chi amus fatu a totu sos chi l’ant lassada de primitiu, nois s’andala chi amus abertu paris l’amus a sighire finas a sa punna manna, cussa de s’indipendentzia, cun tecus e totu sos ateros in su coro e in sa mente. Adiosu Gianne Prè, miticu Zampa Marras a nos bidere de frecuente in s’ammentu.
SU INTERRU est cras, lunis 30, a sas 15 in Ittiri, a partire dae sa cresia de Santu Predu.